ARSENAL FOOTBALL CLUB CHANCHIN
Club Chanchin tlangpui
Arsenal Football Club, Arsenal tih ngawt emaw, Gunners ti emawa lam thin hi London khawpui hmar lam, Holloway Venga English professional football club a ni a. FA Premier League khel phak kumkhua, English football club hlawhtling ber zinga mi a ni. First Division-ah leh Premier League-ah vawi 13 an champion tawh a, FA Cup vawi 10 an la tawh a, 2005–06 kum khan London khawpuia football club-te zinga UEFA Champions League final thleng hmasa ber an ni. European football clubs zinga a tha zual thlan chhuah G-14 zinga tel phak ngat an ni bawk.
Arsenal club hi London khawpui chhimchhak lam veng pakhat Woolwich Venga 1886 kuma din a ni a, 1913-ah Highbury Venga Arsenal Stadium-ah an insawn a. May 2006-ah Highbury chhuahsanin, tuna an hmun thar, Holloway Venga Ashburton Grove-ah, Emirates Stadium-ah an insawn leh a. Arsenal hi, an awmna Holloway Veng atanga kilometre sarih lek, Tottenham Venga Tottenham Hotspur nen hian an inhal ber ngar ngar fo a, 1913 atang tawh khan North London Derby-ah kum tin an insu deuh ziah nghe nghe.
Arsenal hi 1886 kuma Kumpinu ralthuam dahkhawmna hmunpui Royal Arsenal-a hnathawktuten Dial Square hming pua Woolwich Venga an din tan a ni a, Royal Arsenal tiin a hming an thlak zui thuai a. 1891 kum a professional club an lo nih tan atangin Woolwich Arsenal tiin club hming an thlak leh a. 1893 kumah Football League Second Division-ah an tel tan a, 1904 kumah First Division an kai a. Club dangte awmna ngaihtuahin he club awmna veng hi a penhleh deuh bik avangin inkhel entu an hmu tlem thin a, sum lamah harsatna khirh tak tak an tawk thin a, 1910 kumah phei chuan an cha bechhe ta mai a. 1913 kumah, Second Division-a an tlak leh hnu lawkah, Thames luipui kanin North London-a Highbury Vengah Arsenal Stadium tharah an insuan a, an club hminga Woolwich tel thin pawh 1914-ah chuan paihin Arsenal tih ngawt a lo ni ta a ni.1919 kum khan chuan 5-na lek an ni chungin an aia khel tha zawk leh an hal em em Tottenham Hotspur lehkhalhin First Division kaitir an ni a, kaitir an nih dan hi a fair vak lo nia sawi a ni.
1925 kumah Arsenal hian pa hlawhtling tak mai Herbert Chapman-a manager atan an ruai a. Chapman-a hian 1923-24 leh 1924-25 kumah te league-ah Huddersfield Town a lo champion-pui tawh a; Arsenal pawh an hlawhtlin kaltluan lai hmasa ber a rawn thlenpui zui reng a ni. Alex James leh Cliff Bastin te la lutin, tactics thar ruahthamloh rawn phawrhin leh training hautak zet mai nen, English football khelmualah 1930 chho vel khan an rawn vawklallen ta a. 1930 atanga 1938 chhung khan First Division-ah vawi nga champ-in, FA Cup vawi hnih an la a. Vanduaithlak takin Chapman-a hi 1934-ah pneumonia-in a thi hlauh mai a, a thawhrimrah hi a hmu kim hman lo hle; London Underground station pakhat Gillespie Road tih thin chu Arsenal Station tiin a hming a thlaktir hman hram. Football club hming pu station awm chhun liau liau a ni.
Indopui 2-na vanga football inkhelpui chawlhsan vek kha, chhunzawm a lo nih leh tak khan, Manager Tom Whittaker-a hovin Arsenal hi league-ah 1947-48 leh 1952-53 kumah te an rawn champ leh a, FA Cup1949-50 kumah an la bawk a. Chuta tang erawh chuan Arsenal hian tlak hniam lam an pan a, 1930 chho lai vela football star thiam ber berte an hip khawm thei ang kha an ni pha ta lo va, kum 1950, 1960 chho vel phei kha chuan club vantlang hnuai lamah, vawi khat phei chu 15-na leka hniamah an tawlh fual ta daih mai a. Manager atana England captain lo ni tawh thin Billy Wright-a an han rawih ngial pawhin kum1962 atanga 1966 thleng khan eng ruai an ni pha chuang lo.
Arsenal hian 1966 kumah rinalohin an club physiotherapist tang lai Bertie Mee kha manager-ah an ruat tlat mai a, an club chet that hunlai thawh hnihnna an thleng tan leh ta a ni. League Cup final vawi hnih an han thleng phawt a, 1969-70-ah Inter-Cities Fairs Cup, European trophy an lak hmasak ber an la a. League Cup leh FA Cup a double-in 1970-71 kumah an han la zui a. 1972-73 kumah First Division final-ah, 1971-72, 1977-78 leh1979-80 kumah te FA Cup final-ah, 1979-80 kumah Cup Winners’ Cup final-a (penalties)-ah, a vanduai zawkah an tang chamchi zui leh a. Heng chho lai vela Arsenal Club chet that awm chhun chu 1978-79 kuma FA Cup inkhel tawp dawn tepa goal an thun avanga Manchester United 3–2-a an hneh tum kha a ni. Kha inkhel kha chu kumkhaw sawi a tling zui ta reng a nih hi.
Football thiam lar George Graham-a manager atana 1986 kuma lak a nih atangin Arsenal vanglai vawi thumna a rawn intan leh a. 1986-87 kum League Cup an la nghal a. 1988-89 kumah an la leh a (Liverpool nen final-ah). 1990-91 kumah (vawi khat khel tih loh khel dang zawng zawnga chak fai vekin) an la leh a, 1992-93 kumah FA Cup leh League Cup double an la leh a; 1993-94 kumah European Cup Winners’ Cup. Heng Arsenal chaknate hi a ropui hlawm tehreng nen, Grahama hian inkhelthiam mi thar an lei laiin agent Rune Hauge-a hnen atangin kuttlinglo sum (kickbacks) dawn a nei thin tih hmuhchhuah a ni hlauh mai a, 1995 kumah bantir a ni ta a ni. Graham-a thlaktu Bruce Rioch-a chuan season khat chauh a daih; Board member-te nen an inhmuthiam lo va, a bang zui thuai a. 1990 chho leh 2000 chho vela Arsenal chet that em em leh takna hi chu manager atana Arsène Wenger-a 1996-a an lak vang a ni tawp mai. Wenger-a hian tactic thar eng eng emaw leh training kalphung thar bakah ramdang mi khelthiam, English khelthiamte nena inmil mi engemaw zat a rawn chhawp lut a. League leh FA Cup double-a lak vawi thumna 2001-02 kumah Arsenal hian an la zui nghal reng mai a (vawi khatna 1970-71 kumah, vawi hnihna 1997-98 kumah a nih kha). 1999-00 kumah UEFA Cup final an lut a, (tie-breaker penalties-ah Galatasaray an chak zawk a). 2002-03 leh 2004-05 FA Cup an la a, 2003-04 kum Premier League-ah match 49-ah match khat mah an hloh lo va, The Invincibles (hneh theih loh) hming an pu ta hial reng a.He mi hma lam hian League match 49 azawna chak tluan chhuak dang English Club an la awm ngai lo va, an la awm leh rih lo bawk.
Wenger-a hova English Premier League season 10 khel tawhah hian season riat lai mai chu 1-na emaw 2-na emaw Arsenal hian an hauh phak zel a ni. 1993 kuma Premier League bul tan a nih atang khan League-a chak phak club 5 an awm a. Arsenal, Manchester United, Blackburn Rovers, Liverpool leh Chelsea. Arsenal hian Champions League quarter-final bak an la thleng sang ngai lo va; 2005–06 kumah erawh chuan final an lut phak a, 2-1in FC Barcelona khan an hneh ta lo hlauh mai pawh a. Kum 50 liam ta chhunga London club zinga final thleng hmasa ber an ni;
Crest
Royal Arsenal Club tih a nih laia crest hmasa ber chu 1888 kumah pharh a ni a, laipui 3, hmar lam hawi (chung lam hawi) lem a chuang a, Woolwich Borough crest nen a inang hle. Laipui lem chuan meikhuchhuahna dawt lem a ang deuh tia sawisel a ni thin a, mahse a cheimawina sakeibaknei lu lem leh a behbawm dangte vangin laipui lem tih chu a chiang alawm, an ti tho bawk. Highbury lama 1913 kuma insawn hnuah a cheina behbawm vel telh a ni ta lo va, 1922 kumah laipui pakhat chauh lem tar a ni ta thung a, khawchhak (vei lam) hawiin. He design pawh hi an hmang rei lo. 1925 kum atangin laipui chuan khawthlang (ding lam) a hawi ta thung a, a ngul pawh a zen ta deuh a. 1949 kumah crest atan Club hming laipui lem chungah ziakin lehkhasei (scroll) lemah Latin tawngin Club motto, Victoria Concordia Crescit (victory comes from harmony) a inziak a, rawng sen, eng-sen leh hring-a chei a ni ta bawk a.
Crest design hi an tihdanglam sek avang hian Arsenal hian an trademark atan an register tak na a, an copyright theih loh phah reng a. 2002 kumah crest mawl leh tluangtlam zawk, tunlai mite duhdan mil zawk an design tha leh a, an copyright thei ta bawk a ni.
Arsenal team uniform rawng chu a tlangpuiin kawr sen lar, a ban var leh kekawr var a ni ber thin. A sen a nih kher hian chhan mumal tak a nei a. 1886-a Club dintute pahnih, Fred Beardsley-a leh Morris Bates-a te, Nottingham Forest team-a khel tawh thinte’n, Dial Square club team an han rem khawm zawhin, team uniform lei mai tur an hmu lo va. An telna club hmasa Nottingham Forest hnenah an va dil a, football pakhat nen an lo pe ve mai a. Nottingham Forest uniform rawng chu kawr senduk deuh leh kekawr var leh mawza pawl a ni a; chuvang chuan Arsenal hian Nottingham Forest zar an zo hriatreng nan uniform rawng sen an pu hlen ta a ni.
1933 kum khan a nauteho ‘form chu langsar deuh se tiin Herbert Chapman-a’n dak bawm sena sen hlarh hlarh kawrin a thlaksak a, kawrban var a hmang bawk a. Kawrban var lo chhuahna hi chu a chiang lo; sawi dan a phir tawh. 1966–67 kum khan Arsenal-ho hian kawr apuma sen vek an ha a, fans-hoin an duh lo nasa lutuk a, a kum lehah chuan kawrban a lo var leh ta a ni. 2005–06 kum khan Highbury Stadium-a khelh kum hnuhnung ber a nih tawh dawn avang ngawtin, Arsenal kawr senduk Nottingham Forest rawng kha, an ha leh a. 2006–07 atang chuan a pangngaiah an let leh ta a ni.
Arsenal uniform entawn hi a tlem berah pawh club dang pathum an awm. 1909 kumah Sparta Prague club-in khatih laia Arsenal uniform ang chiah an inbel ve a. 1938 kumah Hibernian club-in an copy ve leh a. 1930 chho velah Sporting Clube de Braga-in an copy ve leh a, Os Arsenalistas (Arsenal of the East) tih an nih phah a, tun thlengin an la hmang ta zel.
Mi dang khelmuala an va inbel (away colours) chu a eng leh a pawl a ni ber thin. 1982 - 1984 kumahte erawh chuan a hring leh a dumpawl an ha bawk.1990 hnu lamah chuan team colours (uniform) hi thil hralh tla em em mai, sumdawnna lian tham a lo ni ta a; chuvang chuan away colours hi an thlak danglam kumtin ta a ni.
Arsenal uniform hi 1982 atang kha chuan sponsor a ni ta zel a, 1999 thleng JVC-in an sponsor a. SEGA Dreamcast-in 1999–2002 chhung, O2 -in 2002–06 chhung, Emirates-in 2006 atanga 2014 thleng. A siamtu chu 1986 atangin Umbro; 1986–94 chhung Adidas; 1994 atangin Nike.
Stadium
London khawpui chhim-chhak venga an awm chhung zawng deuh thaw chuan Arsenal team chuan Plumstead-a Manor Ground an hmang thin a, kum thum chhung, (1890 - 1893) a bul lawka Invicta Ground an hmang leh a. Manor Ground hi a tirah chuan field satliah mai a ni ve a, Arsenal-in September 1893-a League match an khelh ve hmasak ber dawn tumin a entute thutna tur an dawh chawp a ni. Manor Ground hi North London lama1913 kuma an insawn dawn thleng, kum 20 tlawng an hmang a ni.
Arsenal Stadium, Highbury tih mai thin kha, September 1913 atanga May 2006 thlenga Arsenal home thin a ni a. Kha stadium kha football architect lar zet mai, Archibald Leitch-a design a ni a, a hun laia England-a football stadium tam ber ang bawkin entute thutna chhawrdawh sir khat chung nei, sir thum dang chung nei lo a ni thin a. 1930 chho vel lai khan hmar lam leh chhim lam sira entute thutna chung siam belh a ni. Highbury kha entu mi 60,000 chuang leng a ni. 1990 chho vel thleng kha chuan entu 57,000 lenna a ni thin a, Premier League Danah 1993–94 atang khan entute thuttir vek tur a nih avangin tihdanglam a ni tak hnu chuan Highbury seat 38,4192 chauh a awm ta a. 1998–99 kum leh 1999–00 kuma Champions League khelh a han nih dawn phei kha chuan zawrhthil pholanna (advertising hoardings) siam belh a ngaih tam avangin, Arsenal hian home atan Wembley Stadium, entu 70,000 chuang lenna an hawh a ngai ta ringawt mai a ni.
Highbury kha mihring chenna venga awm, insi tlat a nih avangin zauh ngaihna a awm thlawt lo va. Tunhnaiah te chuan Highbury-in a dawl theih aia tam daih ticket lei duh an awm reng a ni si a, Club tan a uiawm em em a ni. Hmun hrang hrang an khaikhin hnu-ah 1999 khan Highbury atanga chhim-thlang lam km chanvea hla, Ashburton Grove-ah entu 60,000 leng stadium thar sak rel thluk a lo ni ta a. Permit lak tih vel ang reng vangin sak tan theih a ni lawk lo va; engtin tin emaw July 2006 khan, 2006–07 English Premier League khel tan hman chiahin stadium tha, Emirates tih ni ta hi, peih fel hman hram a nia. Airline company pakhat, Emirates Airlines hian £100,000,000 in an sponsor a. English football chanchinah sponsorship man tam ber a tling. Arsenal fan ruhkawl tam tak erawh chuan stadium hminga sponsor-tu hming hman hi ngaithei lovin he stadium that hi Ashburton Grove emaw the Grove tiin emaw an lam lui tlat bawk. He stadium hming hi 2021 thleng chuan Emirates Stadium tih a ni zui dawn rih phawt a, Gunners uniform-ah pawh 2013–14 thleng chu fly Emirates tih a chuang reng rih dawn a ni.
Arsenal Fans
Arsenal fan ruhkawl hi an thahnem khawp mai. Highbury leh Ashburton Grove-ah Gunners an khelh apiangin seat ruak sawi tham a awm ngai lo. 2005-06-ah pawh Arsenal hi English club zinga entu ngah ber 6-na an ni phak a, seat 38,184 chu luah ziah thin ang a ni a, chu chu seat 100-ah 99.4 tihna a ni. Club din tirh atanga avaia chhut phei chuan 4-na an tling. Arsenal fans hian an club-a kheltute The Gunners tih an nih zulah Gooners an inchhal deuh ber. Emirates Stadium awmna Veng, Canonbury leh Barnsbury te hi mi hausa veng an ni a, hausa leh hausa nep deuh chen pawlhna Islington, Holloway leh Highbury veng te, themthiam leh kut hnathawka ei zawng tamna veng Finsbury Park leh Stoke Newington vengte’n an hual bawk a. Heng vengahte hian chuan Arsenal fans bak club dang fans sawi tham an awm lo a ni deuh mai a. Gooners-te hi hausa tawntaw atanga eichawp dap tih mai tur thlengin an inpawlhsawp nasa hle. Chu bakah Arsenal fans zingah hian club dang fans aiin mingo ni lo an tel tam lawr lak a, za zelah 7.7 an tling hial a ni.
English football club lian dangte ang bawkin, Arsenal hian mumal taka indin Fan Club an ngah khawp mai.A langsar ber chu Official Arsenal Football Supporters Club a ni a, Arsenal club zawm fel thlap (affiliated) a ni. Arsenal Independent Supporters’ Association erawh chuan in-affiliate ve lovin mahniin an ding pir tlat thung a. Fan club te hi fanzine (fan magazine) chhuah thin te pawh an awm nawk mai. The Gooner, Highbury High, Gunflash leh Up The Arse! te hi chutiang fanzine lar deuhte chu an ni. English football entute au-hla pangngai bakah, Arsenal fans hian One-Nil to the Arsenal (Go West thlukin) leh Boring, Boring Arsenal an sa dual dual thin. Boring, Boring Arsenal phei hi chu lehlam pawlin Arsenal chet chhiat zual laia an sak khum thin kha a ni nghe nghe lehnghal a, a sakkhum thintute an sak el khum let leh ta hlauh thung a ni.
Tunhnaiah Ashburton Grove hnaivaia mite chauh ni lova, khawvel ramtina miten Arsenal inkhel lai TV-a en ve theih a lo nih tak hnu hian Arsenal hian London chu sawi loh, England pawh sawi loh, khawvel ram tinah fans an ngah ta em em mai. Arsenal fan zawng zawng hi 2005 kum khan Granada Ventures company-in a chhut danin 27,000,000 tlingin an hria a, fans ngah lamah 3naah ngaih a ni. (Granada Ventures hian Arsenal Club neitu nihna 9.9 % an nei.)
Arsenal nena inhal rei ber tawh leh inhal urhsun ber mai chu Tottenham Hotspur an ni a, anni pahnih inkhel hi chu North London derby tih bik a ni. London club ve tho, Chelsea leh West Ham United te nena an inkhel pawh derby chu a ni ve ngei tho na a, Arsenal leh Tottenham inhal leh iner ang em ema iner dang an awm ve vak lo. Hemi bakah kum 1980 hnu lamah chuan Arsenal leh Manchester United te hi han inep leh deuh chu an ni a, mahse anni inkar hi chu khelmual luh dun chiah boruakah deuh mai a ni thung a; Premier League-a champ an inchuh tak zauh zauh vang deuh mai a niin a lang. Arsenal leh Tottenham inhal dan nen chuan tehkhin chi a ni lo.
Arsenal Minu lam
Arsenal Ladies Football Club an awm ve a, Arsenal-ah affiliated an ni.1987 kuma din a ni a, 2002 kumah an semi-professional tan a; English Women’s Football-ah Club hlawhtling ber an ni. An Manager chu Vic Akers, Arsenal Kit (‘form) Manager ni mek bawk a ni. Arsenal Ladies hian FA Women’s Premier League-ah an khel phak a; champion mek an ni a; 2006 kha an vawi riat champ-na a ni. FA Women’s Cup vawi sarih an la tawh a, Women’s League Cup vawi riat. 2006-07-ah UEFA Women’s Cup final an lut a, English women’s club zinga thleng sang ber an ni. Arsenal Vice-Chairman thin David Dein-a kha Arsenal Ladies President a ni. Boreham Wood khelmualah an inkhel tlangpui a, Emirates Stadium-ah kumtin vawi khat khel thei an ni.
Chhinchhiah tlak
David O’Leary-a’n Arsenal tan 1975 - 1993 chhungin vawi 722 first team-ah a khel a, khel tam ber a ni rih. Arsenal Captain thin Tony Adams-a’n a dawt a, vawi 669 a khel. Goalkeeper David Seaman-a khan vawi 563 a khel a, ‘keeper zinga khel hnem ber a ni. Tuna Arsenal Captain Thierry Henry hi top scorer a ni a, January 29, 2007 thleng khan goal 225 a khung. a dawtah Ian Wright-a’n goal 185. Cliff Bastin-a’n goal 178. Henry-a hian English Premier League-a Arsenal goalscore sang ber a ni a, January 29, 2007 thleng khan goal 173 a khung chu Sunderland nena March 9, 1935-a inkhel tumin a ni a, mi 73,295-in an en. Emirates Stadium-ah mi 60,432 chauh a thut theih avangin entu tam lamah hi chuan tunhma hun hi khum a nih tawh lawk loh hmel. English football hrim hrimah Arsenal hian ber nihna an nei nual. Kum 80 (2006-07 chhung) chatlak lova football league sang bera an awm hi a la rei ber a; May 2003 leh October 2004 inkar chhung English Premier League-a match 38-ah hneh loh an neih loh ngar ngar kha a la rei ber rih bawk.Arsenal hmaah hian English Premier League-ah hneh loh nei lovin 1888–89 kumah Preston North End Club champion an lo ni hmasa tawh a, mahse match 22 chauh an khel thung.
2005-06 khanArsenal hian UEFA Champions League-ah anmahni lama goal khat mah luhtir lovin match10 paltlangin record an siam a, record hmasa A.C. Milan match sarih an khum a ni.Inkhel indawt zela belhkhawma minute 995 chhung an goal an venghim ngar ngar a; final khel niin minute 76naa Barcelona Samuel Eto’o-an Arsenal goal-a a rawn pet luh khan he record rei eltiang hi a rawn tibawrhbang ta a ni.
English Premier League chanchin pumpuiah Arsenal hi 14na hnuaiah vawi sarih chauh an la tla hniam a; chutih laiin 1900 - 1999 chhung zawng khan an position chawhrualin 8.5-naah an awm thei a, chu chu a sang ber a ni. FA Cup a kum zawna la thei awm chhun an ni bawk, (2002 leh 2003-ah)
Books on Arsenal:
The Official Illustrated History of Arsenal. Soar, Phil & Tyler, Martin (2000). Hamlyn. ISBN 0-600-60175-7.
Rebels for the Cause: The Alternative History of Arsenal Football Club. Spurling, Jon (2004). Mainstream. ISBN 0-575-40015-3
Official websites
Arsenal.com Official club website
Arsenal at the FA Premier League official website
Arsenal at the UEFA official website
General fan sites Fanzines
Arseweb Arsenal-Mania Up the Arse!
Arsenal World Arsenal Land The Gooner
